مقدمه علمية :-
كلنا نعرف ان الاسماك من الاشياء القليلة التي ممكن اكلها بالكامل تقريبا وتهضم بدون اي مشاكل
فعظم السمك عبارة عن فوسفات كالسيوم مفيد جدا وممكن هضمه بمعدة الانسان وامهاتنا في اسكندرية يعرفو ده بالفطرة . علشان كده اكلة النهارده عبارة عن
فلافل البسارية
متستغربش لو انت اسكندراني اسال الوالده او الجده حتقولك
المكونات والطريقة :-
شوية بساريه صاحيين من حلقة السمك ( صغيرة في حجم البرغوت وبتلمع زي الفضة ) الكبيرة متنفعش
فلفل اخضر حامي + ثوم + كمون + بقدونس + ملح + بصل ( نفرم ده كله مع بعض كويس )
نخلطه بالبساريه بعد غسلها ونرش شوية دقيق ابيض وشوية دقيق ذرة ان امكن .
نبدا في عمل وحدات الطعمية من الخليط ونظبطه بالدقيق لو طري
نقلي في زيت عادي زي الطعمية ( الحرفنه انها متفكش منك )
بعد القلي نجهز طاسة فيها ثوم نحمرة ونطشه بالخل ونزود شوية ميه ونحط الفلافل فيه وهيه سخنه ( متغرقهاش طبعا )
كده ورغيفين عيش بلدي بالردة وسلطه خضراء مشكله من كله كل ما هو اخضر والوان وبالهناء والشفاء
وجبة متكاملة وياريت الاطفال ياكلو معاك
بروتين وفسفور وكالسيوم سهل الهضم في البسارية
البقدونس فيها يقلل امتصاص الدهون
الثوم مضاد حيوي طبيعي
الخل فاتح للشهية
خضروات السلطة مش محتاجه شرح
العيش بالردة طبعا الياف وفيتامين ب وزيت جنين قمح
بس يا ريت تحبس بشاي اخضر كده يبقي بالهناء والشفاء
ويا بخت الفقير بفقره ربنا برضه منظمهاله
شفتم اهلنا زمان كانو بيعملو ايه
الرئيسية
